Baş çekip burc-ı felekten yine nur-ı ezeli
Doğdu hurşid-i kemal-i ezeli lem yezeli
Menzil edindi meğer hane-i burc-ı hameli
Şem'-i bahtın uyarıp eyledi ruşen zühali
Gün gibi şule salıp aleme ilm ü ameli
Alemi altına aldı kamu nur ü zuleli
Bin güneş doğdu bulunmaz anın asla bedeli
Doyurup han-ı vilayat ü keramatı dili
Bir nazarda kılıp asude nice kur ü şeli
Hak çerağın uyarup eyledi ızhar celi
Mazhar-ı nur-ı Nebi mahzen-i esrar-ı Ali
Pir-i erkan-ı tarikat Hacı Bektaş-ı Veli
Nokta-i nun-ı Nebi nüsha-i Kur'an oldu
Ba-i Bismillah ile sure-i Rahman oldu
Ehl-i inkar olanın küfrüne iman oldu
Şeb-i zulmette güneş tek meh-i rahşan oldu
Ruz-ı mahşerde dila mihr-i dırahşan oldu
Haste-dil cismine can derdine derman oldu
Fukara ehline ser-asker ü sultan oldu
Kaail-i kavl-i Makaalat-ı azizan oldu
Fatiha ümm-i kitab ayet-i Furkan oldu
Sırr-ı piran-ı Acem şah-ı Horasan oldu
Mazhar-ı nur-ı Nebi mahzen-i esrar-ı Ali
Pir-i erkan-ı tarikat Hacı Bektaş-ı Veli
Zübde-i nesl-i Muhammed güher-i Şir-i Huda
Hasen ile Huseyin sırrını kıldı peyda
Abid ü Bakır u Sadık'tan olup rah-nüma
Ceddi çün Kazım idi ibni Ali Musa Rıza
Şheh Taki ile Naki Askeri'dir ruz-ı vegaa
Mehdi-i nutk u beyan Fazl-ı Huda nur-ı hüda
Ehl-i beytin ocağın eyledi çünkim ihya
Şem'-i Hak'tır ki verir haşre değin nur u ziya
Nur-ı çeşm-i budala pertev-i mihr-i illa
Kayser-i Rum anın oldu eşiğinde geda
Mazhar-ı nur-ı Nebi mahzen-i esrar-ı Ali
Pir-i erkan-ı tarikat Hacı Bektaş-ı Veli
Çhar darb ile anındır elif ü tıyg u tıraş
Ser ü riş ile bürut oldu dila hem dahı kaş
Kutlu baştır ki çeker sikkesini ışk ile faş
Ana kurban olanın yoluna bin can ile baş
Kör yüzün nice görür şa'şaalardan huffaş
Sırr-ı Hakk'a eremezmiş netekim akl-ı maaş
Münkirin kalbine yazılmadı mühr-i Bektaş
Sikke-i şahiye layık mı ola her kara taş
Faş guyem be tu men gaafil ü güm-rah mebaş
Gaafil olma gözün aç eyleme gaflet kardaş
Mazhar-ı nur-ı Nebi mahzen-i esrar-ı Ali
Pir-i erkan-ı tarikat Hacı Bektaş-ı Veli
Evliyanın birisi bir gün olup şire süvar
Yılanı kamçı edüp eyledi ol azm-i diyar
Lazım oldu ki ana karşu çıka pes Hünkar
Bindi bir taşa hemin ol şeh-i ali-mıkdar
Emredüp dedi yürü yürüdü ol demde dıvar
Dedi canluyu yürütmeklik eğendir iy yar
Hüner oldur yürüye cansız iken bir kühsar
Kafer-i mutlak olur her kim ederse inkar
Bunun emsali nice kıldı vilayet ızhar
Binde birin demeğe bendede yoktur mıkdar
Mazhar-ı nur-ı Nebi mahzen-i esrar-ı Ali
Pir-i erkan-ı tarikat Hacı Bektaş-ı Veli
Yüzbin ihlas ile Oniki İmam'ın kuluyuz
Vech-i Hatem'de olan nutk u kelamın kuluyuz
Ehl-i beyt ile olan sırr-ı selamın kuluyuz
Fukara içre olan kavl-i peyamın kuluyuz
Adem'e secde eden rükn-i kıyamın kuluyuz
Tac-ı Bektaş çeker sanma avamın kuluyuz
Rum sadıkları abdal-makamın kuluyuz
Şey' u lillah mevali-i izamın kuluyuz
Keminin kemteriyüz ya'ni gulamın kuluyuz
Yüz sürüp dergehine şah-ı enamın kuluyuz
Mazhar-ı nur-ı Nebi mahzen-i esrar-ı Ali
Pir-i erkan-ı tarikat Hacı Bektaş-ı Veli
Aşıkane nefesi Vahdeti meydane ilet
Işık meydanını gözler Şeh-i merdane ilet
Yüzünü yerlere sür canib-i divane ilet
Bade-i ışk ile la ya'kıl ü mestane ilet
İsmi Sersem Ali'dir mürşid-i erkane ilet
Nice mürşid nazarı ekmel-i insane ilet
Ya'ni Sultan Balı'nın nakdi olan kane ilet
Fukara ehline ser-asker olan cane ilet
Dergeh-i şah-ı felek kadr ü melek-şane ilet
Kuş dilin fehmedici zat-ı Süleymane ilet
Mazhar-ı nur-ı Nebi mahzen-i esrar-ı Ali
Pir-i erkan-ı tarikat Hacı Bektaş-ı Veli