Buldular Ol Bi Nişandan

Buldular ol bi nişandan çok nişan Abdaller

La mekan ilinde tuttular mekan Abdaller

Sattılar bir yare cümle iki alem rahtını

Yasamadılar dükan içre dükan Abdaller

İçtiler Fazl-ı ilahi çesmesinden ab-ı Hızr

Ettiler kesb-i hayat-i Cavidan Abdaller

Erdiler tahkıyka taklidin yıkıp bünyadını

Buldular viranede genc-i nihan Abdaller

Düşmeninden Ehl-i beyt-i Ahmed'in olup beri

Oldular candan muhibb-i hanedan Abdaller

Kerbela'da can revan edenler içün teşne-leb

Ettiler gözyaşların ab-ı revan Abdaller

Bunda ol mesmum-ı rah-ı din Hasan şah ışkına

Ettiler çün nuş-ı niş-i can-sitan Abdaller

Bezm-i mahşerde ümid oldur ki yarın içeler

Saki-i Kevser elinden nuş-ı can Abdaller

Hem tutup her dem Huseyn-ibn-i Ali'nin matemin

Aglaşıp gözden dökerler bunda kan Abdaller

Oldular Zeynel-İbad'ın çün ibadı oldular

Can u dil milkinde şah-ı şeh-nişan Abdaller

Bakır'ın ser-tac edinip ayağı toprağını

İşin altun eylediler bi güman Abdaller

Pey-rev olup pişrev edindiler çün Ca'fer'i

Menzil-i maksuda erdiler heman Abdaller

Musi-i Kazım eşiğin edinip muhkem hisar

Buldular cünd-i havadisten aman Abdaller

Ettiler Şah-ı Horasan'ın ayağı tozunu

Can ü dil çeşmine kuhl-i İsfahan Abdaller

Şeh Takıy ile Takıy'nin medhini bülbül gibi

Subh u şam edindiler vird-i zeban Abdaller

Oldular çün Askeri'nin askeri kimden ne gam

Alemi seyreylesünler sadman Abdaller

Var ümidim kim doğup bir gün günü mü'minlerin

Ere devr-i Mehdi-i sahib-zaman Abdaller

Hayreti'yi gam şebinde koyasız layık mıdır

Olmıyasız ol garibe mihriban Abdaller

Siz erenlerden niyaz oldur ki reddolunmaya

Eyledi meydanda çün ruh-ı revan Abdaller